Rusiya Kişinyovdakı səfirliyinin üç əməkdaşının ölkədən çıxarılmasına sərt və adekvat reaksiya verəcək.

Bu barədə Rusiya Xarici İşlər Nazirliyinin rəsmi təmsilçisi Mariya Zaxarova bəyan edib.

“Rusiyanın Kişinyovdakı diplomatik nümayəndəliyi 1961-ci il Diplomatik Münasibətlərə dair Vyana Konvensiyasının tələblərinə tam uyğun şəkildə fəaliyyət göstərir və Moldovanın daxili işlərinə müdaxilə etmir. Moldova hakimiyyətinin bu düşmən mövqeyinə qarşı Rusiyanın adekvat cavabı olacaq”, - XİN rəsmisi vurğulayıb.

Zaxarova əlavə edib ki, rus diplomatlarının ölkədən çıxarılması əsassız qərardır və bu addım Kişinyovun antirusiya siyasətinin tərkib hissəsidir.

Qeyd edək ki, Moldova Xarici İşlər Nazirliyi Rusiyanın Kişinyovdakı səfiri Oleq Ozerova səfirliyin bir neçə əməkdaşının arzuolunmaz şəxs elan olunması barədə nota təqdim edib.