1990-cı il yanvarın 20-si Azərbaycan xalqının azadlıq və müstəqillik uğrunda apardığı mübarizənin ən faciəli, eyni zamanda ən şərəfli səhifələrindən biridir. Həmin gecə sovet imperiyası özünün bütün qəddarlığını nümayiş etdirərək, dinc əhaliyə qarşı ağır hərbi cinayət törətdi. Tarixə 20 Yanvar faciəsi kimi düşən bu hadisə, əslində, Azərbaycan xalqının iradəsini qıra bilməyən bir imperiyanın son aqoniyası idi.

Yanvarın 19-dan 20-nə keçən gecə Bakı şəhərinə və respublikanın bir sıra bölgələrinə yeridilən sovet ordusu tanklar, zirehli texnika və ağır silahlarla günahsız insanlara hücum etdi. Rəsmi məlumatlara görə, yüzlərlə insan şəhid oldu, minlərlə vətəndaş yaralandı. Qadınlar, uşaqlar, yaşlılar fərq qoyulmadan atəşə tutuldu. Bu, insanlıq tarixində qara ləkə kimi qalan qanlı bir gecə idi.

Lakin 20 Yanvar yalnız faciə deyil, həm də milli oyanışın, qəhrəmanlığın və azadlıq əzminin simvoludur. Azərbaycan xalqı həmin gün öz azadlığını, müstəqil yaşamaq haqqını canı və qanı bahasına müdafiə etdi. Şəhidlərimizin göstərdiyi müqavimət sonradan müstəqilliyə aparan yolun təməl daşına çevrildi.

Ulu Öndər Heydər Əliyevin 1990-cı il yanvarın 21-də Moskvada verdiyi tarixi bəyanat 20 Yanvar hadisələrinə ilk siyasi-hüquqi qiymət oldu. Məhz bu mövqedən sonra faciənin əsl mahiyyəti dünya ictimaiyyətinə çatdırıldı. Azərbaycan müstəqillik qazandıqdan sonra isə 20 Yanvar hadisələrinə dövlət səviyyəsində hüquqi-siyasi qiymət verildi və şəhidlərimizin xatirəsi əbədiləşdirildi.

Bu gün 20 Yanvar şəhidlərinin məzarları ziyarət olunur, onların xatirəsi dərin ehtiramla anılır. Şəhidlər Xiyabanı xalqımız üçün müqəddəs məkana çevrilib. Onların tökdüyü qan yerdə qalmadı – Azərbaycan bu gün müstəqil, suveren və qalib dövlətdir.

20 Yanvar şəhidləri Azərbaycanın azadlıq tarixində əbədi yaşayacaq. Onların fədakarlığı hər bir azərbaycanlı üçün vətənpərvərlik dərsi, milli qürur mənbəyidir.

Şəhidlərimizə Allahdan rəhmət diləyir, xatirələrini dərin ehtiramla yad edirik.